السلام عليكم ورحمة الله وبركاته
أعلن الشاعر الغنائى أيمن بهجت قمر، عن قراره فى البحث عن مشروع جديد يتماشى مع فكره، بعد مقاطعته العمل مع أبو الليف، مؤكداً أن قرار الإنفصال فى العمل جاء بالتراضى وذلك لإختلافهم فى وجهات النظر مؤخراً.
حيث كتب على صفحته الشخصية عبر موقع التواصل الاجتماعى "فيس بوك": "كنا طول الوقت انا وتوما ومحمد يحيى بنشوف مشروع ابو الليف على انه مشروع مختلف وكنت حاسس انه شكل جديد نقدر نقول فيه كتير ونتكلم ف اللي مابنتكلمش فيه مع مطربين تانيين ..في البدايه اتهاجمنا هجوم قاسي من اللي ما استوعبوش التجربه وكانوا باصين لها بنظره سطحيه ولكن لقينا رد فعل من عدد كبير من الجمهور فاق التوقعات بدءاً من اختيار اسم نادر مروراً بالألبومين اللي عملناهمله وكنا بنسعى جاهدين ان ابو الليف مايتصنفش ف دايرة الغنا الشعبي الصرف ومايتحطش ف نفس القوس اللي جواه سعد الصغير وبوسي واحمد شيبه الخ مع احترامي ليهم بس ده مش مشروعنا ولا ده قدر موهبة ابو الليف ولا دي المزيكا ولا الأفكار اللي تتحط في الإطار الشعبي التقليدي ".
وتابع: "ويمكن الفكر ده ابتدى يتعارض مع طموح ابو الليف في الفتره الأخيره لإنه اتشهر وهو كبير والأغاني اللي بنعملهاله من وجهة نظره ونظر البعض مابتأكلش عيش وهو اكيد معزور عشان كده لما اتأكدنا من جوانا ان ابو الليف عايز يمشي ف طريق تاني هو من حقه يختاره ، طريق مش متماشي مع فكرنا قررنا اننا نتمناله التوفيق والنجاح وتركه بكل حب وود وبالتراضي تنفيذاً لرغبته لإستكمال مشروعه الفني اللي هو شايفه وبالطريقه اللي تريحه وقررنا احنا كمان البحث عن مشروع غنائي جديد نقدر نكمل معاه اللي ابتديناه".
